سوپاس و پێزانین

ژیانی تاراوگه‌نشینی به‌ مانای دوور که‌وتنه‌وه له‌ خزم و که‌سوکار و وڵات و به‌ گشتی هه‌موو ئه‌و خۆشه‌ویستانه‌ی که‌ پێکهێنه‌ری بیره‌وه‌رییه‌ خۆش و ناخۆشه‌کانن. بێگومان دایک و باب که‌ ڕه‌مزی هه‌بوونی هه‌موو مرۆڤێکن له‌ سه‌روی هه‌موو ئه‌وانه‌نن و ئاره‌زوی له‌ باوه‌ش گرتنیان و حه‌سانه‌وه‌ له‌ په‌نایان بۆ ساتێکیش له‌ بیر و زه‌ین ناچێته‌ ده‌ر.

خۆ کاتێکیش به‌ جێگای وه‌دیهاتنی ئه‌و ئامانج و ئاره‌زویانه‌ هه‌واڵی دڵته‌زێنی له‌ده‌ستدانی هه‌رکام له‌ ئازیزانه‌ به‌تایبه‌ت دایک و باب به‌ده‌ست دگا، ئێش و ئازاره‌که‌ی ئه‌وه‌نده‌ قورس و جه‌رگ بڕه‌ که‌ نه ‌زمان توانای ده‌ربڕینی ئه‌و هه‌سته‌ی هه‌یه‌ و نه‌ هیچ پێنووسێکیش ده‌توانێ بیهێنێته‌ سه‌ر کاغه‌ز.

له‌ هه‌لومه‌رجێکی ئاوادا ئه‌گه‌ر ده‌رگای به‌شداری کردن ده‌گه‌ڵ که‌سوکارانی نزیک له‌ کۆڕی ماته‌مینه‌کانیشدا له‌و که‌سانه‌ داخرابێ، هه‌مووجارێک هه‌واڵان و که‌سانی خاوه‌ن هه‌ستی مرۆڤایه‌تی جێگای که‌سوکار و خزمانی نزیکیان گرتۆته‌وه‌ و باری گرانی خه‌م و په‌ژاره‌کانیان سووکتر کردووه‌.

له‌وبواره‌دا به‌پێویستی ده‌زانم له‌ لایه‌ن خۆم و بنه‌ماڵه‌ی قاره‌مانی و هه‌موو بنه‌ماڵه‌ی دایکی خوالێخۆشبووم عیسمه‌ت خانمی شێخ ئاغاییه‌وه‌ پڕ به‌دڵ سوپاسی هه‌موو ئه‌و که‌سانه‌ بکه‌م که‌ به‌ ته‌له‌یفون و مایل و  یان خود به‌شداری کردن له‌ کۆری ماته‌مینه‌که‌یدا هاوده‌ردی خۆیان نیشان دا و باری گرانی ئه‌و خه‌م و په‌ژاره‌ قورسه‌‌یان له‌سه‌ر شانی من سووک کرد و جێگای به‌تاڵی  نزیکترین که‌سوکاره‌کانمیان بۆ پڕ کردمه‌وه‌.

قاسم قاره‌مانی

2008-04-11